სოციალური სამუშაო ერთ-ერთი პროფესიაა, სადაც ძირითადად ქალები არიან წარმოდგენილნი. შექმნის დღიდან პროფესიას ფემინისტური ხასიათი აქვს და მას ყოველთვის ქალები ხელმძღვანელობდნენ. ისინი ემხრობოდნენ ქალებისა და სხვა უმცირესობების უფლებების თანასწორობას. თუმცა, სწორედ მისი ფემინისტური ხასიათის გამო, ეს პროფესია მარგინალიზებული გახდა. სოციალური მუშაკების ხმა, დარდი და პრობლემები არ ესმით შესაბამისი გადაწყვეტილების მიმღებ პირებს. სოციალური მუშაკები ფლობენ უნიკალურ, უშუალო ცოდნას ქვეყანაში ყველაზე მოწყვლადი ჯგუფების შესახებ და მათ მნიშვნელოვანი წვლილი შეაქვთ საზოგადოების მდგრადობაში. თუმცა, მათი საქმიანობა ხშირად არაღიარებულია, ისინი განიცდიან სხვადასხვა სახის დისკრიმინაციას სამუშაო გარემოში, ხოლო მათი მნიშვნელოვანი საზოგადოებრივი როლი უგულებელყოფილია.
პროექტი „ფემინისტური მიდგომების გაძლიერება სოციალურ მუშაობაში“ მიზნად ისახავს გენდერული თანასწორობის ხელშეწყობას სოციალური მუშაობის ფემინისტური გადააზრების გზით. „სოციალურ მუშაკთა გაერთიანება“ გეგმავს, გააძლიეროს სოციალური მუშაკების ფემინისტური პრაქტიკა და გააფართოვოს მათი ქსელი ოჯახში ძალადობისა და ექსპლუატაციის წინააღმდეგ საბრძოლველად. ეს განსაკუთრებით მნიშვნელოვანია ქალთა მიმართ ძალადობისა და ოჯახში ძალადობის მაღალი მაჩვენებლის მქონე რეგიონებში. გაეროს ქალთა ფონდის მიერ საქართველოში ჩატარებული „ქალთა მიმართ ძალადობის ეროვნული კვლევის“ მიხედვით (2017), ამ ნიშნით განსაკუთრებით ყურადსაღებია კახეთი და ქვემო ქართლი. მნიშვნელოვანია სოციალური მუშაკების ცნობიერების ამაღლება და თვითდახმარების ინსტრუმენტების შემუშავებაში მხარდაჭერა. პროექტში შერჩეულ სოციალურ მუშაკებს ჩაუტარდებათ ტრენინგები ფემინისტურ საკითხებზე, რათა მათ შეძლონ თავიანთ საქმიანობაში სათანადოდ ჩართვა და ცოდნის სხვა სოციალური მუშაკებისთვის გაზიარება. გარდა ამისა, ორგანიზაციის ვებგვერდი და ფეისბუქის გვერდი, აქტიური სოციალური მუშაკების ჩართულობით, გთავაზობთ მასალებს თვითგანათლებისა და გაძლიერებისთვის.
